Spiritual
Saturday, December 6, 2014
Monday, December 1, 2014
Monday, November 17, 2014
Sunday, November 2, 2014
Friday, October 31, 2014
Wednesday, October 15, 2014
ዓላማ
ዓላማ
በዘጸአት 17፡8-16 ላይ የተመሰረተ ግጥም ነው
አማሌቅ የእግዚኣብሔርን ሕዝብ ሊወጋ
የሕዝቡን እምነት ሊያናጋ
ወደ ራፊድ ምድር ቢጠጋ
ነጻ የወጣውን ሕዝብ ሊያስገብር
እንዳይወርስ የተጥራበትን ምድር
እግዚኣብሔር ተመልክቶ የልቡን ክፋት
አማሌቅ ሕዝቡን ከማጥፋቱ በፊት
እግዚኣብሔር ሙሴን ጠርቶት
እንደዚህ ብሎ አለው
የአማሌቅን ዝክር አሳየዋለሁ
ለዘላለም ከምድረ ገጽ አጠፋዋለሁ
ለሌሎች መቀጣጫ አደርገዋለሁ
ይህንን የእኔን ጦርነት ተዋጋ
ድል ያንተ ነው አትዘናጋ
ሙሴ ይህንን ዜና ሲሰማ
አመነ እንደሚደመሰስ የጠላት አድማ
ሙሴ አንግቦ የእግዚኣብሔር በትሩን
ከፍ አድርጎ የሚያውለበልበውን
የተጠራበት አመራሩን
ወጣ ወደ ኮረብታ ይዞ አቅጣጫውን
ረዳት አድርጎ ሖርና አሮንን
ኢያሱም ለጦርነት የሚያስፈልጉትን
ወጣት ጀግና የሆኑትን
የእግዚኣብሔር ጦርነት የሚዋጉትን
ወረደ ወደራፊድ ሊመራ ጦርነቱን
ሊበቀላቸው አማሌቃያንን
አሮንና ሐር የሙሴን እጅ በመሸከም
የዛለው ጉልበቱ እንዳይደክም
እያሱ ጦርነቱን እንዲያሸንፍ
ሰራዊቱ በአንድነት እንዲሰለፍ
አማሌቅ ከምድረ ገጽ እንዲጠፋ
የእግዚኣብሔር ሕዝብ እንዳይከፋ
ነበረ ሰንደቅ ዓላማቸው
እግዚኣብሔር የሰጣቸው
ከግቡ ያደረሳቸው
ዛሬም እኛ በደረስንበት ዘመን
እግዚኣብሔር የሰጠን ወንጌላችን
የሰላም መጫሚያችን
በአንድነት በሕብረት ተያይዘን
የሰይጣንን ክንድ ሰባብረን
ሥራውን አፈራርሰን
የእግዚኣብሔርን መንግስት አድረሰን
ሕዝቡን ነጻ አውጥተን
ማየት ነው ዓላማችን
ወንጌል ለሕዝብ ማድረሳችን
በቸር ይግጠመን!!
ኃይሉ ነኝ Oct 15/2014
Thursday, October 9, 2014
ውሻ ይሳምህ!!
ውሻ ይሳምህ !!!
ሰሎሞን
በመኃልየ እንደጻፈው
የፍቅርን ምስጢር እንደገለጸው።
ፍቅር ዜማ ቅኔ እንደተቀኘው
የፍቅርን ኃያልነት ሀሁ ያስተማረው
ፍቅረኛው ለፍቅረኛዋ
ለመከራ ጊዜ ጓደኛዋ
በአፉ መሳም ይሳመኝ
መውደዱን እንዲገልጽልኝ
የፍቅሩ መግለጫ ይህ ነው
ከንፈሬን ግምጥ ሲያደርገው
ነጩ ከንፍሬን ሲያቀላው
እስትንፋሴ ጭልጥ አስኪል
እስትንፋሴ ጭልጥ አስኪል
እስኪያሳጣኝ አቅል
መሳም ነው ምልክቱ
ከኖሩበት በፍቅር ሕይወቱ
አንድ ቀን ግን ያ ዕለት
የተረገመች ለሊት
ጎን ለጎን አብረን ሆነን
በአልጋችን ላይ ተጋድመን
ለሊቱን በሰላም አድረን
ለሊቱን በሰላም አድረን
ጠዋት ከአልጋው ላይ ለመነሳት
ለመሄድ ወደ መስሪያ ቤት
ቅሬን ልሳምሽ ብላት
አላውቅም ያደርግኩትን
በሕልሜ የፈጸምኩትን
በቅዥት ዓለም የሆንኩትን
ያየችው አልገባኝም
ምስጢሩን አልተረዳሁም
እርግማን ይሁን ምርቃት
ውሻ ይሳምህ በማለት
አሰናበተችኝ ወደምሄድበት
ሥራዬን ስሰራ ውዬ
ስኬጅዋሌን አጠቃልዬ
ማታ አመሻሹ ላይ
እኔ ውሻውን ሳላይ
የተረገመ ሶሎግ ውሻ
ሳይታወቅ መነሻውና
መድረሻ
ዘሎ ደረቴ ላይ ተጠመጠመ
እንደ ፍቅረኛው ከንፈሬን
ሳመ
ስሚ አለቅም ብሎ
በግዝት ያገባኝ መስሎ
መከራ ፍዳዬን አሳየቶ
ከከንፈሬ ሙዳ ሥጋ
አንስቶ
በአማልጅ በምልጃ በጩኽት
ሮጦ ገባ ከወደ መጣበት
ጥሩ ፍቅረኛ ያላችሁ
መሳሙን ይሳማችሁ
መግለጫ ነው ለፍቅራችሁ
አትበሉ በምንም ዓይነት
እርግማን ይሁን ምርቃት
ውሻ ይሳምህ ብላችሁ
ሲደርስ ይቆጫል ማለታችሁ
ኃይሉ ነኝ
በቸር ይግጠመን!! 21/08/2014
Sunday, August 3, 2014
Tuesday, July 1, 2014
Monday, March 17, 2014
Sunday, March 16, 2014
አጀንዳችን ምንድነው?
አጀንዳችን ምንድነው?
የካናዳ አብያተ ክርስቲያናት ኅብረት
በ1993 ዓም በዚሁ በካልጋሪ ከተማ ተመሰረተ ። ዛሬ ከአስራ ስድስት ዓመት በኋላ በፊላድልፍያ የእግዚኣብሔር ጉባኤ ቤተክርስቲያን
ጋባዥነት በካልጋሪ ከተማ (Lake Louise) ስብሰባ ያደረጋል እንደ እግዚኣብሔር ቃል ተሰብስቦ መወያየቱ ለጌታ ሥራ ስለሆነ
የሚደገፍና የሚበረታታ ጉዳይ ነው ። ሕዝበ ክርስቲያኑ ይሰበሰባሉ የሚለው ዜና ሲሰማ ፤ ከተመሰረተ ጀምሮ ድርጀቱ ምን ሰራ ፍሬውስ
ምንድነው? የሚል ጥያቄ በውስጡ ይመላለስ ይሆናል። መቼም የአብያተ
ክርስቲያናቱ ኅብረት የሰራውንና የወሰነውን በተውካዮቹ ፓስተሮች በኩል ሳይገለጽ የቀረበት ጊዜ ያለ አይመስልም ። ፊላድልፍያ መጽሔት
ዛሬ ለአብያተ ክርስቲያናት ኅብረት ልታሳስበው የምትፈልገው ሃሳብ አላት ። ከዚህኛው መጽሔት በፊት በታተመው እትም ለአንባቢዎችዋ
እንደገለጸችው ። በእግዚኣብሔር ለተመረጡ ለእግዚኣብሔር ወገኖች የምትለው ፤ በአገራችን ሁኔታ የወደፊት አጀንዳችን ምንድነው ?
የኢትዮጵያና የኤርትራ ሕዝብ ከኋላ ቀርነታቸው የተነሳ ትምህርት ቤት ፤ መገናኛ ፤ የንፁህ የመጠጥ ውሃ የለውም ከዚህም በላይ በኑሮ
ውድነትና በተለያየ ጊዜ በረሃብ እየተጠቃ ነው ። እኛ ደግሞ የምናተኩረው በወንጌል ላይ ብቻ ነው ። በእርግጥ በወንጌል ላይ ማተኮራችን
ዋናውና አስፈላጊ ነገር ነው ። ግን የእግዚኣብሔር ቃል እንደሚናገረው ጌታ ኢየሱስ ለደቀመዛሙርቱ ሕዝቡ የእግዚኣብሔር ቃል እየሰሙ
ስለዋሉ ፤ ተርበዋል የሚበሉትን ስጡአቸው አላቸው ። እዚህ ላይ እንደምንመለከተው የእግዚኣብሔር ቃልና ቁስ የሆነው ርሃባቸውን የሚያስወግዱበት
ምግብ ባርኮ ሰጣቸው ። እንደዚህ ባለው ጉዳይ ላይ ማተኮር ደግሞ ግዴታችን ነው ። ዛሬ በተለያየ ዘርፍና በተለያየ ሁኔታ የሀበሻውን
ሕዝብ ለማገልገል ከውስጡ በወጡት ልጆቹ በጎ አድራጎቶች እየተቋቋሙ ነው ። እነርሱም በአብያተ ክርስቲያን ኅብረት አባላት ቤተ ክርስቲያን
ሥር እየተደራጁ ነው ። ሥራው አንድ የእግዚኣብሔር መንግሥት የሚያስፋፋ መሆኑን ተረድቶ በሚያስፈልገው ሁሉ ሊረዱአቸውና ሊያበረታቷቸው
ይገባል የቤተክርስቲያንም አንድ አካል አድርገው ሊመልከቱአቸው ያስፈልጋል ። ሞቅ ሲል የሚታቀፉ ሙቀታቸው ዝቅ ሲል ደግሞ የሚጣሉ
መሆን የለባቸውም ። የካናዳ አብያተ ክርስቲያን ኅብረትም ይህንኑ ጉዳይ የሚከታተል ኮሚቴ አቋቅሞ በማደራጀትና በማበረታታት ሃሳቡን
በተግባር ሊያካሄደው ይገባል ። የተቀደሰ ዓላማ ስለሆነ ዋናው አጀንዳ ቢያደርገው መልካም ነው ። ተያይዘን አገራችንን በተቻለ አቅም
እንርዳት ሃምሳ ሎሚ ያለው አንድ ሰው ሸክሙ ፤ ለሃምሳ ሰው ጌጡ ነውና ።
ጌታ ይባርካችሁ!!
የመስቀል ወፍ
የመስቀል ወፍ
በአገራችን በምድራችን
በወንዛችን ተራራችን
ያኔ ሳንመጣ ካናዳ
እንደዛሬ ሳንሆን ባዳ
ለነገሩ ሳንሆን እንግዳ
በአበሾቹ ቀዬ መንደር
የምናስታውሰው ያለ የነበር
ዘመን አልፎ ሲመጣ ዘመን
ሁልጊዜም የሚታሰበን
በሕልማችን በሃሳባችን
በምናባችን የሚታየን
አሮጌው ዘመን አልፎ
አዲስ ዘመን አሸንፎ
ከዘመን ዘመን አልፈን
አዲስ ዓመት እውን ሲሆን
ሐምሌ ነሐሴ ክረምቱ
ሲያልፍ ጭጋግ ወራቱ
ያኔ በአገራችን በቀያችን
በገጠር ከተማ መንደራችን
በአንድነት ሆነው ሴቶቻችን
የኮባ ግልድም አገልድመው
ፀጉራቸውን ሳዱላ ተሰርተው
ቅቤ በአደስ ተቀብተው
ወርቀ ዘቦ ካባ ደርበው
ተመራርጠው በዕድሜያቸው
ጎራ ከፍለው እንደእኩያቸው
እርስ በእርሳቸው
ሴቱ በአንድነት ሆነው
ዘመን ሲለወጥ በዕለቱ
ሰው ከሰው ሳይገናኝ
በጠዋቱ
እማማና አባባ ሳይነሱ ከመኝታ
እንደተሰማ የወፍ ጫጫታ
ሳምንት ወር የተሟሸውን
በእሳት በቅቤ የቀለጠውን
ሴትዋ እየደለቀች ከበሮዋን
ለተቀባያዋ ስታቀነቅን ዜማዋን
ታቅፋው አደይ አበባዋን
ቄጠማ አክርማውን
እንኳን አደረሳችሁ ለማለት
ሲሽከረከሩ በየሰዉ ቤት
ያዜሙ ነበር እንደዚህ በማለት
አበባዮሽ ለምለም
በአባብዬ ቤት ለምለም
ቁሙ በተራ ለምለም
አበባ ለምለም ወሸባ ለምለም
እንደርስዎ ጌታ የለም
ከብረው ይቆዩ ከብረው
ለዓመት ወንድ ልጅ ወልደው
ሰላሳ ጥጃ አስረው
ከብረው ይቆዩ ከብረው
ይህንን ብለው አዜመው
የመልካም ምኞት ገልጸው
ምርቃት ለሕዝብ ሁሉ ሰጥተው
ወር ሳምንት ሳይሞላው
ክረምቱን መውጣቱን አስልታ
የአደይ አበባውን መፍካት አይታ
የደመራውን እሳት ተመልክታ
ውብ ዜማዋን እያዜመች
መምጣቷን እየተናገረች
ትመጣ ነበር የመስቀል ወፌ
እንድኖር ክረምት ወጣ ብዬ አርፌ
ዛሬ ዘመን ቢያልፍም
ክረምቱ ቢፈጸምም
ብሩህ ሰማይ ቢታይም
ፀሐይዋ እንኳንብትወጣም
ከዘመን ዘመን ብንሻገርም
ወፌን አላየዋትም
ወፌን አላያችሁም ወይ እንዳልል
ሁሉም ይናፍቃታል
ለራሱ ይመኛታል
መምጣቷን ይጠብቃል
ቢያያት ያከብራታል
ለሚስጢር ይፈልጋታል
በቤቱ ያስቀምጣታል
ወፌ የዘንባባ ዝንጣፌ አላት
ሰላምን የምታበስርበት
ፍቅርን የምትገልፅበት
ብትመጣ ጊዜዋን ጠብቃ
እንደዚህ እላታልሁ በቃ
እነሆ ክረምት አልፎአል
ዝናቡ ቆሞ በጋ መጥቶአል
በየመስኩ ኣዳይ አበባ አብቦአል
የአበባው ሽታ ምድርን ሞልቶአል
የአዝመራው ጊዜ ደርሶአል
የመስቀል ወፌ ከሄድሽበት
ርቀሽ ከኖርሽበት
ድምፅሽን ልስማው
ዜማሽን ላዳምጠው ስላት
ብትሰማኝ ብትመጣልኝ ልንገራት
ወፌ የመስቀል ወፍ
ኃይሉ ገቢ Jan 7/2007
ዜግነት
ዜግነት
ገና በሕጻንነት ሳለሁ በት/ቤቴ
ፊደል አስቆጣሪዬ የት/ቤት አባቴ
የሕብረተሰቡ አካል እንዲሆን መሰረቴ
ፊደል አስቆጠረኝ እንዳውቅ ስለዜግነቴ
አስተማሪው ሲያስተምረኝ
እንደዚህ ብሎ አለኝ
ደሙን ያፈሰሰ ልቡ የነደደ
በአገር ፍቅር ስሜት ጠላት ያስወገደ
ጠላትህ መሀይምነት ነው
ሕዝቡ እንዳያውቅ ያደረገው
ባለጋራህ በሽታ ነው
ሕዝቡን በሞት የሚቀስፈው
አንተ ተምረህ ካስተማርከው
ዜግነት ማለት ያ ነው
ዜጋ ዜግነት የሚባለውን
የአገር መሰረት የሆነውን
እንደ ማህተሜ በጉያዬ
በደረቴ ላይ አንጠልጥዬ
አስተማሪው ባስተማረኝ
ዜግነትን ስለተረዳሁኝ
በስርዓቱ ስለሄድኩኝ
ሕዝቡን ስላስተማርኩኝ
አቅጣጫውን ስለነገርኩኝ
በሽታውን ታምሜ ቁስሉን ስለጠገንኩኝ
የሚራበውን ተርቤ ሕዝቡን ስላስተማርኩኝ
አንዱ መጥቶ ሲያስረኝ
ሌላው ደግሞ ሲፈታኝ
ዘመኔን አሳለፍኩኝ
ዜጋ እሱ ብቻ መሰለኝ
ዜግነት እንደሌለኝ ቆጠርኩኝ
ስለዚህ መናገር ካልቻልኩኝ
ሕዝቡን ካላስተማርኩኝ
የቁም እስረኛ ከሆንኩኝ
ዜግነትን ከተገፈፍኩኝ
አገሬን የማገለግልበት ሰዓት
እስኪ መጣ የምፈለግበት ዕለት
ለአገሬ አንድ ቀን ብቆይላት
ይህንን ከልቤ ጋር አስቤበት
ሄድኩኝ ወደ ባዕድ መሬት
የደረስኩበት ምድር
አሁን የምኖርበት አገር
እትብቴ የልተቀበረበት
ዘር ምንጅላቴ የልኖረበት
የዘር ዐረጌ የሌለበት
ሰጠኝ የመኖር ነፃነት
ስናፍቀው የነበረው ዜግነት
ተምሬ እንዳስተምር
ሰርቼ እንድከብር
ከአንዱ ቦታ ወደ አንዱ ለመዘዋወር
በነጻነት በሁሉም ቦታ እንድኖር
አለኝ ነጻነት የተሟላ
ሥራ ቢሆን ከለላ
ምን ያደርጋል !!!
ሁሉም ነገር ቢሟላልኝ
ተትረፍርፎ ሁሉን ባገኝ
የሰላም አየር ብተነፍስ
ሁሉም ቢቀየር እንደአዲስ
አገሬ ትናፍቀኛለች እትብቴ የተቀበረበት
አያት ቅድመ አያቴ የሞቱላት
እናትና አባቴ የኖሩበት
አፈር ፈጭቼ ያደግኩበት
በየኔታ ቤት የተማርኩት
ፊደል የቆጠርኩበት
አገሬ ትዝ ትለኛለች
የታሪክ ቁንጮ የሆነች
ወሎ ላሊበላ ጎንደር
አክሱም እንደዚሁም ሐረር
ሉሲ የተፈጠረችበት
የታሪክ ምዕራፍ የተገለጸበት
አባይ አዋሽ ያለበት
የተከዜ ፏፏቴ የሚፈስበት
ዘርዝሬ የማልገልጸው
አውርቼ የማልጠግበው
በየትም ቦታ የማላፍርባት
በአደባባይ የምናገርላት
ባንዲራዬን የማውለበልብላት
አሁንም እናፍቃታለሁ
ኢትዮጵያነት ለእኔ ዜግነት ነው
ኃይሉ ገቢ Oct 25/2007
ኢትዮጵያችን
ኢትዮጵያችን
አማራ ጉራጌ ሳንል
በዘር ትብታብ ውስጥ ሳንውል
ሁሉም በአንድነት በጋራ
ማንም ሳይቀር ከኤርትራ
ቦታ ሥፍራ ሳንለይ
ሳይኖርብን ከልካይ
በሂዋርዝ ጥላ ውስጥ ሆነን
ብርጅን እኩሌታ አጋምሰን
ዘመን ከዘመን ለመሸጋገር
ሚሊንየምን ለማክበር
ከፍ አለች ባንዲራችን
ተውለበለበች ሰንደቃችን
እኔም የሥራ ልብሴን አውልቄ
የሰንበቱን ልብስ አጥልቄ
እንደ እንቁጣጣሽ ደምቄ
ይዤ አደይ አበባዬን
ዘመን መለወጡን ማብሰራዬን
እንቁጣጣሽ ዘመን ያምጣሽ ለማለት
ሕዝቡን በሩቁ አሻግሪ ስመለከት
ባንዲራዬን አየዋት ጠገብኳት
በልጅነቴ ሰንደቅ ዓላማችን ያልኳት
ትግርኛ ጉራጌኛው አማርኛ ጭፈራው
ዳንሱ እስክስታ ሽለላው
የማይጠገበው የአበባዮሽ ጨዋታ
ልባችንን ሞላው በደስታ
ያኔ የአገር ቤታችን ሕይወት
በሰው መንፈስ ውስጥ አየሁት
እኔም በምናቤ ተመለከትኳት
የእትብታችን መቃብር ቤታችን
ውብ አገር መመኪያችን
እኛን ያፈራችው አገራችን
ምድረ ገነት ኢትዮጵያችን
ኃይሉ ገቢ መስከረም1/2000- Sep11/2007
ቃል ኪዳን
ቃል ኪዳን
በአንቺና በእኔ መካከል የነበረ
ቃል ኪዳኑ የተፈራ የከበረ
ትዝታውን ካልረሳሽው ካልካድሽው
ለደቂቃ ለሰኮንድ አስታውሼው
ከሥራ ቦታ እኔን ለማየት
አኔም አንቺን ለመሸኘት
እኔ ሥራ ላይ ከሌለው ጭንቀት
በፊትሽ ላይ የነበረው
ምን ሆኖ ይሆን የት ሄደ
እስኪሉሽ የወደደና ያበደ
ቃል ኪዳን የእህትነት
በንፁህ ፍቅር ስሜት
ያን ሁሉ አውርተን ተጨዋውተሽ
ዛሬ እንዴት ጠፋ ከሕሊናሽ
ለፍላፊ ያልሽኝ ምን ብዬ
ምን አጥፍቼ ምን በድዬ
ወሽካታ ያልሽኝ ምን ዋሽቼ
ምን ተናገርኩኝ ኽረ! መቼ
አውርቼ ይሆን ዘላብጄ
የሰደብሽኝ ውድ ወዳጄ
እኔን ሰድበሽ አስቀይመሽ
እንደ አለንጋ አንቺ ገርፈሽ
አናደሽ ጭራ አስበቅለሽ
አሁን ደግሞ ትሸሼያለሽ
እባክሽን ቃል ኪዳኑን አስታውሰሽ
እንታረቅ እንስማማ ሁሉን ትተሽ
ኃይሉ ገቢ 15/6/1975
ትዝታ
ትዝታ
አንቺ ሶቭየት ኅብረት ለመሄድ
እኔም አንቺነትሽን በመውደድ
ሳይነጋ በሌሊት አንቺን ለመሸኘት
በሰላም ያግባሽ ለማለት
ሄድኩኝ ቦሌ መሸኛው ድረስ
ሸኝቼሽ ወደ ሥራ ለመመለስ
ብጠብቅ የሚመጣው ሌላ
መንፈሴ ተጨነቀ ሰውነቴ ተጉላላ
ውድ እህቴ ሄዳ ይሆን
ሳንተያይ ዓይን ለዓይን
ሰው አገኝ ነበር ሄዳ እንኳን ቢሆን
ብዬ በሃሳብ ስብከነከን
ድንገት ዓይኔን ወደኋላ ስመለከት
አንቺን አየው የእኔ እመቤት
በሩቅ ሆነሽ ጃኖ ለብሰሽ
ደብተር ብዕር በእጅሽ ይዘሽ
አውለብልቤ ሰላም አልኩሽ
በዓይኔ ብቻ አንቺን ሸኘውሽ
አይሮፕላኑ ተሻገረ
አመረረ እየበረረ
ወደ ሰማይ ገብቶ ቀረ
ይህ ለእኔ ትዝታ ነው
ምንጊዜም የማልረሳው
ኃይሉ ገቢ1981
ሳቀች
ሳቀች
እንደሞናሊዛ አይደለም ፈገግታ የለበትም
ለማስመሰል ይመስላል እኔን አላረካኝም
ሳቀችብኝ ቅዳሜ ማታ
እኔን አይታ ተመልክታ
ሳቀች እኔን እያየች
ምን ይናገረኝ እያለች
ድሮ ጥንት ስንተዋወቅ
እኔን እንደዛሬ ሳትንቅ
ሩጫ መሮጥ ስትጀምር
ተስፋ እንዳትቆርጥ ስንመካከር
መስኮብ እሄዳለሁ ስትለኝ
የሞራል ድጋፍ እያደረግኩኝ
ሞራሏ እንዳይሰበር እየመከርኩኝ
አልጄሪያ ኬንያ ሞምባሳ ስትሄድ
አገር ውስጥም ለሥራ ስትገደድ
ናዝሬት ደብረ ዘይት ለሥራ
ሲቻለኝ እየሄድኩ ማንንም ሳልፈራ
አወይ የሰው ነገር
ምንም ሳልናገር
ሳቀች ተንተከተከች
የተበደለ እየመሰለች
አይደል እንደሞናሊዛ ፈገግታ የለበትም
ተንተክትካ ሳቀችብኝ እኔ ግን አልበደልኳትም
በእኔስ ብትስቂ አይገርመኝም
ወንድምሽ ነኝ ምንም አላጠፋሁም
ኃይሉ ገቢ 1973
የምሥራች
ማስታወሻ
ከዚህ በታች የሚገኙት ግጥሞች ከ1973 -1975 ባሉት ጊዜያት ከጻፍኳቸው
ሲሆኑ ከማስታወሽዬ ውስጥ ያገኘዋቸው ናቸው።
የምሥራች
ደስታዬን ተካፈሉ እልል በሉ
ዘመድና ወዳጆቼ በሙሉ
አኩርፋኝ የነበረች ጓደኛዬ
መንምኖ የነበረው ተስፋዬ
አንድ ቀን በምሽት
ዘመድ ወዳጆቼ ባሉበት
ላንቀያየም በአንዳች ነገር
ማንም ላያጠፋ ካለን በምድር
ያለፈውን ይቅር ብለን
ለሚቀጥለው በሰላም ለመሆን
ታረቅን ዘመዶቼ
እልል በሉ ወዳጆቼ
የእኔን መጥፎ የማትወደውን
የእሷን ጉድለት የማልሻውን
ጓደኛዬን ወድ እህቴን
አይቻት የማልጠግባትን
ታረቅን እንደ በፊቱ ልንሆን
ኃይሉ ገቢ 1973
ያረጀ አንበሳ
ያረጀ አንበሳ
ጥንት ዓለም በእግዚኣብሔር ሲፈጠር
አዳም ከሄዋን ጋር በገነት እንዲኖር
እንስሳት አራዊት እንዲያስተዳድር
ሊገዛ ሊመራ የአምላክ ፈቃድ ነበር
አዳም አጠፋና ከገነት ሲባረር
ሁሉም እያረጀ ሁሉም ይሞት ጀመር
በሕይወት እየኖረ አርጅቶ እንዲሞት
አዳም በማጥፋቱ ጌታ ፈረደበት
አንበሳ አርጅቶ ማደን ሲያቅተው
ጉልበቱ ይደክምና ነገር ግራ ሲገባው
የዝንብ መጫወቻ የዓይን አር ማከማቻ
ተከታዩ ጠፍቶ መሆን ነው ለብቻ
ጸሐይ ወጥታ ስትከር ዕዳር ታሀሳስ ጥር
ክረምት ሳይገባ ሲመጣ ግንቦት ወር
ከተማው ሲገማ ቆሻሻ ሲከመር
ዝንብ ይፈለፈላል ለማጥፋት ለመብረር
ሲበር ሲያጠፋ ያገኛል አንበሳ
ጊዜ የጣለውን ኮሳሳ ሬሳ
አንበሳ ሲያገሳ ያላየችው ዝንብ
ዓይኑን ታወጣለች መስሎአት የዕለት ምግብ
ጀግና ነበር አንበሳ የአራዊቶች ንጉስ
ዛሬ ግን ተነሳች እሱን ለመደምሰስ
መላ አከላቱን ዓይኖቹን ለማፍረስ
ዝንብ የአንበሳን ጉልበት ዙፋኑን ለመውረስ
ኃይሉ ገቢ 1985
ዓለም በቃኝ
ዓለም በቃኝ
ዓለም በቃኝ ወህኒ ቤቱ፤ማሰሪያ ቤት
የምንሊክ ልጅ ዘውዲቱ ያስገነቡት
አምና ካቻምና ድሮ ጥንት
ስንቱ አለፈ ከዚህ እስር ቤት
በግርፋት ቁም ስቅሉን ተመልክቶ
ስንቱ ወጣ ከዚህ እስር ቤት ተሰቃይቶ
በትኋኑ በበሽታው በዝናቡ በወጨፎ
ስንቱ ሞተ ስንቱ ተርፎ
ዛሬ ዛሬ ይህ ሁሉ ነገር ቀርቶ
ት/ቤት ፕሮጀክቱ ተመስርቶ
ላብራቶሪ ጤና ጣቢያ አቋቁመን
ዓለም በቃኝን ውብ አድርገን
መታጠቢያ፤ ሽንት ቤቱ ፤ የፅዳቱ
አቤት ስንቱ የእስር ቤቱ ማስደሰቱ
ቢንጎ ፤ካፍቴሪያ፤ ሕብረት ስቁን
ዳርት፤ቴኒስ መጫወቻ አሰባስበን
ሰው አስተምረን በተራችንም ተምረን
ለዓመታት ሰው አስታርቀን
የበደሉንን ይቅርብለን
ሕዝቡን ብለን ሕዝብን መርተን
ሻማ ሆነን ብርሃን ሆነን ተቀጣጥለን
እስረኛውን አሳሪውን አስደስተን
የሄደውን እየሸኘን የመጣውን እየተቀበልን
ዛሬም እኛ እዚያው አለን
በማማችን ላይ ሆነን
ተራችንን እንጠብቃለን
ኃይሉ ገቢ 1990
አውለብልቡት ሰንደቃችሁን
አውለብልቡት ሰንደቃችሁን
ዘመን አስቆጥራችሁ
የፈረሰውን ገንብታችሁ
ሰው ሳታዩ የሚያያችሁ
አምላክ ይበልጣል ብላችሁ
ስድብና ግልምጫውን ችላችሁ
በጌታ ጎን የቆማችሁ
በልደት በዓል ሳጣችሁ
ትክዝ ብዬ አንብቼ
የምጠይቀውን ሰው አጥቼ
ብጠብቅ ዘመኑን አልፌ
በሳምንቱ ብመጣ ከንፌ
ማንን ልጠይቅ
የትኛው እንደሚለጥቅ
ትምህርት ቤት እንደተማርነው
ሰላሹ ኸረ! ማነው ?
ጊዜ ወር አለፈኝ
ምጤን እያማጥሁኝ
የሚነግረኝ ስላጣሁኝ
ግራ ቢገባኝ አዘንኩኝ
ከሁሉ ጌታ ይበልጣል አልክኝ
ዛሬ ስትጀምሩ አገልግሎቱን
ማምለክ ማስመለክ ስራችሁን
እንዴት ደስ አለኝ መሰላችሁ
በመድረኩ ላይ በመቆማችሁ
በርቱ እግዚኣብሔር ይርዳችሁ
አውለብልቡት ሰንደቃችሁ
ኃይሉ ገቢ Jan27/2007
እኔ አገኘሁት
እኔ አገኘሁት
አምላኬን በጠዋት ገና በማለዳ
ይሁን የሚለኝ እኔን የሚረዳ
ችሎ የሚያስችል እንደልቤ የሚሆን
ልቤ የሚያርፍበት ጌታን የሚታመን
ሁሌም በጸሎቱ እኔን የሚያታጋኝ
ምኞቴ ነበረ ጥሩ ባል እንዳገኝ
ናፍቆቴን በተግባር ሳቀርበው በጸሎት
ፍላጎቴን አይቶ ከሰማየ ሰማያት
ቅሬታ እንዳይገባኝ ልቤን በመመልከት
እርሱ የፈለገው እኔ አገኘሁት
ፍቅርን አግኝቻለሁ!!
መንገዴን ለይቼ መድረሻዬን ገምቼ
መዋለሉን ትቼ በጌታ ጸንቼ
ልቤን ለጌታዬ በፍጹም ሰጥቼ
ካደረኩኝ ወዲህ ጌታን አለንታዬ
ምኞቴን ገልጪ ነገርኩት ለጌታዬ
ጋራ እንዳይሆንብኝ የሚሰጠኝ ትዳር
ብቸኝነት ጠፍቶ በሰላም እንድኖር
በሚሰጠኝ ትዳር እርሱ ብቻ እንዲከብር
ቻይ የሆነች እናት ለእኔ የሚሰጠኝ ሚስት
ይህ ነበር ጸሎቴ ጌታን የጠየቅኩት
ሁሉን የሚችለው እንባዬን ተመልክቶ
የውስጤን የልቤን ጌታዬ ተረድቶ
ንግሥት የምትሆነኝ ሰላም የምትሰጠኝ
ለድካሜ ብርታት ከጎኔ የምትሆነኝ
ላቀረብኩት ጸሎት መልሱን አገኘሁኝ
ችሎታ አይደለም የአምላክ ስጦታ ነው
ሁሉን ሚጠቀልል ፍቅርን አግኝቻለሁ
የአይችሉምናየፍቅር
የጋብቻ መታሰቢያ
ኃይሉ ገቢ
የጀርባው ነገር
የጀርባው ነገር
አውቀዋለሁኝ እሱም ያውቀኛል
አስተዳደጌን ማን ይነግረዋል
ከተራ ሥፍራ ከታች ጀምሬ
አስተዳደጌን ምን ዓይነት ፍሬ
በሥራ ውጤት በምድሬቱ ዛሬ
ነግሬዋለሁ በጥብቅ አብክሬ
በእርከን ቢበልጠኝ ያዘና ወንበር
ሆንኩበት ለእሱ ፋርጣ ባላገር
ቋንቋው ልዩ ነው ጉራማሌኛ
ይመስላል እሱ የሆነ ሕልመኛ
ያጣጣል ዘይቤ ያነጋገሩ
ስላልተራዳው የውን የምሩ
ግራ መሆኑን ስለተረዳሁት
ቀኝ መሆኔን እኔም ነገርኩት
ቀኝ ሲነሳበት ተቃወሰበት
ቁርጡን በመንገር በማስፈራራት
በእኔ ጎዳና በእኔ አቅጣጫ
መሄድ አለብህ ቢሆን በሩጫ
ለዚህ ትህዛዙ መልሴን ሰጠሁት
ስለዓላማዬ በግልጽ ነገርኩት
በማረጋገጥ ማንነቴን ሲያውቅ
ይናገር ጀመር እኔን በመናቅ
ወዳጅ ዘመዱን በጎኑ ላሉት
ይናገር ጀመር እንዲህ በማለት
ቀኝ ቀኝ በማለት ስላስቸገረኝ
ፈራሁት ጓዴን ከየት እንደሚገኝ
የጀርባው ነገር አከራካሪ
ውስጠ ወይራ በጣም አስፈሪ
ይሻላል ለእኛ ጀርባውን ብናየው
ስልጣን ከያዘ በጣም ችግር ነው
ሰበሰበና ወዳጅ ዘመዱን
ይመክር ጀመር የተቻለውን
የጀርባው ነገር ይጠና ያለኝ
ጀርባዬን አይቶ ሊሳፈርብኝ
ታርጋ ለጣፊ ታክሲ አደረገኝ
የጀርባው ነገር ይጠና ያለኝ
የተገጠበች አህያ አደረገኝ
ወይስ ለሸክም እኔን ፈለገኝ
አጋሰስ መጫኛ በቅሎ አደረገኝ
ለሽምጥ የሚመች ወይ ሰጋር ፈረስ
ሲጋልቡበት የልብ የሚያደርስ
ወደ ጦር ሜዳ ሊፈናጠጥብኝ
በትክሻዬ ላይ እሱ ድል ሊያገኝ
ፍልጎ ይሆን ጀርባህን ያለኝ
ኃይሉ ገቢ
Feb 2008
Subscribe to:
Posts (Atom)