ከጀርባ ሞት አለ

            ከጀርባ ሞት አለ

ኃጢያት ስለበዛ በሰዶም ጎመራ

አመንዝራ ርኩሰት ቢሆን በዚያ ስፍራ

ዘፈንና ሟርት ሰዶም ቢንሰራፋ

የኃጢያት ዓይነቶች በአገሩ ቢስፋፋ

አምላክ ተመልክቶ የአሕዛብ ርኩሰት

መላእክት ታዘዙ ሰዶምን ሊያጠፉት

አንድ ጻድቅ ቢገኝ በዚህ የሞት መንደር

መላእክት ተላኩ ወደነሎጥ ሰፈር

የእግዚኣብሔር መላአክ ወደሎጥ ቤት ሄዶ

ማስጠንቀቂያ ሰጠው በጥብቅ አስገድዶ

የከተማው ነውር ስለበዛ ርኩሰት

ትልቅ ስለሆነ በእግዚኣብሔር ፊት

በተወሰነ ሰዓት ጸሐይዋ ሳትወጣ

በሰዶም ጎመራ ቅጣት ስለሚመጣ

ቤተሰብህን ይዘህ በአስቸኳይ እንድትወጣ

ምንም ስለሌለ ስለመኖር ተስፋ

በከተማው ክፋት አንተ እንዳትጠፋ

ሎጥ ስማ አንዳች ሳትዘገይ

ልብሴን ቅሌን ሳትል ሳትሆን ወላዋይ

ሚስትና ልጆችህ ያንተ የሆኑትን

ይዘህ እንድትወጣ ሳታይ የኋላህን

መልእክቱን አስታውሶ መላእኩ ያለውን

ሄደ ወደዞዓር ፈልጎ ከተማውን

የሎጥ ሚስት ግን በሃሳብ ተጓዘች

በሰዶም ያለውን ሀብት ንብረት አሰበች

ስለወርቅ ብሩ በጣሙን ተከዘች

ሀብቴና ንብረቴ የደከምኩበት አለች

አውጠነጠነች አወጣች አወረደች

በአገሩ የሚኖሩትን ሁሉንም ገመተች

እንዴት ይህን ያህል ይጠፋል ብላ አለች

ቤታችን የመጡት የእግዚኣብሔር እንግዶች

ማታ  የተናገሩት በሚስጢር ያወሩት

ለራሳቸው ጥቅም ምናልባት ሊይደርጉት

አስበው ይሆናል አትዙሩ ያሉት

ቢሆንም ባይሆንም እውነት ሆነ ውሸት

ቆይ አንድ ጊዜ ብቻ ከተማዋን ልያት

የምትከተለውን ሁሉ ቤተሰቧን ረሳች

ወዲያውኑ ፊቷን ወደሰዶም አዞረች

የሎጥ ሚስት በቅጽበት የጨው ክምር ሆነች

ሁሉን ነገር ትተን ጌታ ይበልጣል ብለን

እንዳልተከተልነው የዓለም ምቾት ረስተን

ዓለም በቃችኝ ትርፉ ሞት ነው እንዳላልን

መሃላችን ረስተን ዛሬ ከየት አለን?

ቀጭኑ ጎዳና የጠበበው ሕይወት

ይሻልሃል እርሱ ጌታ የሚገኝበት

የሰፊው ጎዳና ጠላት የነገሰበት

ከጀርባው ሞት አለ ለዘለዓለም ሞት

ከጀርባ ሞት አለ የጨው ዓምድ መሆን

ተመለስ ወንድሜ ከንቱ እንዳትሆን

                  

                    በቸር ይግጠመን!!

                     ኃይሉ ነኝ!

ጊዜ ወርቅ ነው።

                                                  ጊዜ ወርቅ ነው ።

        ድሮ ድሮ አገር ቤት አዲስ አበባ አንዳንድ ትላልቅ ሰዎች ቤት ስትገቡ በትልቅ መስተዋት ፍሬም በጥሩ የእጅ ሥራ ዙሪያውን ጽጌረዳ አበባ ተለጥፎበት ከበሩ ፊት ለፊት በግርግዳ ላይ ተሰቅሎ ይታይ ነበር ። በአሁኑ ጊዜ ይኑር አይኑር አላውቅም ። ከንጉሡ መንግሥት በኋላ ያለ አይመስለኝም ። ምክንያቱም ያ ቃል ከንጉሡ ንግግር የወጣ ጥቅስ ነው ይባል ነበር ። ያንን ቃል እንደዚያ አሳምሮ የሰቀለው ሰው በጊዜ ወርቅነት  ይጠቀምበት አይጠቀምበት ባላውቅም ነገር ግን በዘመኑ የሂሳብ ስሌት ለመስታወቱና ለጥቅሱ ብዙ ገንዘብ የወጣበት ይመስለኛል ። ጊዜን ዛሬ ለጽሁፌ ስለምጠቀምበት አነሳሁት ። ጊዜ ምንድነው ? ጊዜ የሚለውን ፊደል ስናየውና ቃሉን ስናነበው ለዓይናችንና ለምላሳችን በጣም ቀላል ነው ። ግን በተግባር ስናየው ከወርቅና ከአልማዝ የሚከብድ አቅም አለው ፤ ወርቅና አልማዝ በገንዘብ እንገዛቸዋለን ፣ ጊዜን ግን ዋጋ ብንከፍልም ልንገዛው አንችልም ። ስለጊዜ በእግዚኣብሔር ቃል በብዙ ሥፍራ ተጠቅሶ ይገኛል ። በኦሪት ዘፍጥረት 1፥5 እግዚኣብሔር ብርሃንን ቀን ብሎ ጠራው ፤ ጨለማውንም ሌሊት ብሎ ሰየመው ። ቀኑ መሸ ሌሊቱም ነጋ ይህም አንድ ቀን ሆነ ይላል። እግዚኣብሔር በመጀመሪያ በመፍጠር ፤ ለፈጠረው ጨለማና ብርሃን ፣ ቀንና ሌሊት በማለት የጊዜ ገደብ አደረገላቸው ። ጨለማው አይሎ ብርሃኑን እንዳይውጠው በተነፃፃሪው ብርሃኑ አይሎ ጨለማውን እንዳያስቀረው ለፈጠረው ነገር ቀንና ሌሊት በማለት እየተፈራረቁ እንዲኖሩ ጊዜን ወሰነላቸው ። እግዚኣብሔር የፈጠረውን የጊዜ ገደብ በመጠቀም ፤ እግዚኣብሔር አንድ ቀን ያለውን ባቢሎናውያን እኩል ለሶስት ከፍለው ለቀንና ሌሊት ጊዜ አድርገውለት ይጠቀሙበት ነበር ። ግብፃውያን ደግሞ በበኩላቸው ከፀሐይ መውጫ  እስከ ፀሐይ መጥለቂያ ሰዓት፤ ለአስራ ሁለት እኩል ከፍለውት ጊዜን ሲጠቀሙበት በመቆየታቸው ለአሁኑ የምንጠቀምበት የጊዜ አቆጣጠር አስተዋጽዖ አድርገዋል ። ኅብራውያን ደግሞ በባቢሎን በምርኮ በነበሩበት ጊዜ የጊዜን አቆጣጠር ከባቢሎናውያን በመማር የራሳቸውን ቀመር አውጥተው ፤ ጊዜን ይለኩት የነበረው በሰዓት ፤ በቀን ፤ በሳምንት ፤በወርና በዓመት ነበር ። ዛሬም ዓለማችን በጊዜ ላይ ሴኮንድና ደቂቃ ጨምሮበት ጊዜን እንደሚገባ ይጠቀምበታል ። በጊዜ ቀልድ የለም ጊዜ ወርቅ ነው ። ንጉስ ሰሎሞን በመክብብ መጽሐፍ ምዕራፍ 3 ፥ 1 ለሁሉም ነገር ዘመን አለው ፤ ከሰማይ በታችም ለሆነ ነገር ሁሉ ጊዜ አለው…. ይላል ። ንጉሥ ሰሎሞን ለሁሉም ጊዜ አለው ሲል ሁሉም በጊዜ ምዕዋር ላይ ይሽከረከራል ማለቱ ነው ። ማንም ከጊዜ ውጭ ሊሆን አይችልም ፤ ወደደንም ጠላን ተቀበልንም አልተቀበልንም ለምናደርገውና በሕይወታችን ሊሆን የሚሆነው ነገር ሁሉ የሚፈጸመው በጊዜ ነው ። ዓለም ሥራውን የሚሰራው በጊዜ ነው ። እግዚኣብሔር የፈጠረለትን ጊዜ እንዳያመልጠው ፤ ጊዜን እንደሚገባው ከመጠቀሙ የተነሳ ጊዜ እንዳያመልጠው ከጊዜ ቀድሞ ለመሄድ ይሞክራል ። ጊዜን የሚጀምሩት ከሴኮንድ ነው ስለዚህ ለሰው ልጅ ሴኮንድ ዋጋ አላት ። ዓለም በብዙ የሚጠቀምበት ኮምፒውተር እንኳን ስራውን የሚሰራው በጊዜና በሰዓት ነው ። ከተመደበለት ሴኮንድና ደቂቃ ወጭ እንዲሰራ ብናዘው አይሰራም ። ለኮምፒውተሩ ጊዜ ያበጀለት ሰው ነው ። እግዚኣብሔር ሰውን ሲፈጥርው በጊዜና በሰዓት ገምቶ እንዲኖር ነው ። በዓለማችን ያደጉ አገሮችና አዳጊ አገሮች የሚባሉ አሉ ፤ ያደጉ አገሮች ተብለው የሚጠሩት ለምንድነው ? ምክንያቱም እነዚያ አገሮች ያደጉት ሕዝቡና መንግሥታቸው ጊዜን እንደሚገባው ስለሚጠቀሙበት ነው ። በአደጉ አገሮች ማንኛውም ተግባሮች የሚተገብሩት በጊዜ በተከፋፈለ ሁኔታ ነው ። ሴኮንድ አትዛነፍም ለጊዜ ክብርን ይሰጣሉ ፤ ስለዚህም በሁሉም አቅጣጫ አድገዋል ። ታዳጊ ወይም ድሃ አገሮች የሚባሉት ለምን ድሃ በመሆን ያዘግማሉ ? የተለያየ ነጥቦች ቢኖርም ዋናው ነጥብ በጊዜና በስራ አምነው ተቀብለው ተግባራዊ ስላላደረጉ ብቻ ነው ። ለምን ጊዜን እንሰርቃለን ? ምክንያታችንስ ምንድነው? ጊዜን በመስረቃችን የሚጎዳው ማነው ? ሁልጊዜም የሚገርመኝ አጋጣሚ አለኝ ፤ ወደ ካናዳ እንደመጣሁኝ ከጥቂት ወራት በኋላ ታመምኩኝና የቤተስብ ሐኪሜ ለከፍተኛ ሕክምና ወደ ሆስፒታል አስተላለፈኝ ፤ የምጠራበትን ጊዜ ስጠባበቅ ቆይቼ አንድ ቀን በአድራሻዬ በዚህ ቀንና ሰዓት እንድትገኝ የሚል ደብዳቤ ደረስኝ ፤ በቀጠሮው ዕለት ከሥራ ቀርቼ ወደ ሆስፒታል ለመሄድ አለቃዬን አስፈቀድኩኝ ፤ የቀጠሮ ሰዓት ከመድረሱ በፊት ወደ ሆስፒታል ጉዞዬን ጀመርኩኝ ፤ ወደ ሆስፒታል አካባቢ ስደርስ ወረፋ ሊኖር ስለሚችል ትንሽ ነገር ቀመስመስ ላድርግ ብዬ ወደ አንደኛው ካፍቴሪያ ጎራ አልኩኝ ፤ ከልቤ ጋር ደግሞ ተጠርቼ የመጣሁት በደብዳቤ ስለሆነ አስር ደቂቃ ቢያልፍም ወረፋም ስለሚኖር የእኔ ተራ እስኪደርስ ድረስ ምንም አይደለም ብዬ በእኔ ግምትና ሃሳብ ቆየውኝ ። ከሻይ ቤት ወጥቼ የቀጠሮ ቦታውን ፈልጌ እስከማገኝ፤ ቦታው ስደርስ ሃያ ደቂቃ አልፎአል ። በሥፍራው ተራ የሚጠብቅ ሰው የለም በጣም ጭር ብሎአል ፤ የሚገባም ሆነ የሚወጣ የለም ፤ በሩን አንኳኩቼ እንዳልገባ በሩ ተዘግቶአል ። ከጥቂት ሴኮንድ በኋላ የሕክምና ልብስ የለበሰች ከውስጥ ብቅ አለች ፤ የእኔ እህት ቀጠሮ ነበረኝ አልኳት ወረቀቱን ተቀብላኝ የቀጠሮውን ሰዓት ተመለከተች እንደገና በእጇ ላይ ያለውን ሰዓት ተመለከተች የቀጠሮ ሰዓት ማለፉን ነገረችኝ ፤ በተጎለዳደፈ እንግሊዘኛም ምክንያቴን ብናገርም በተባለው ሰዓት ስላልተገኘህ ሌላ ቀጠሮ እንሰጥሃለን ብላ ወደውስጥ ገብታ ሌላ የቀጠሮ ወረቀት ይዛ መጣች፤ የቀጠሮውን ወረቀት ስትሰጠኝ በሚቀጥለው ቀጠሮ ቀደም ብለህ እንድትገኝ በቀጠሮው ዕለት ካልመጣህ እንዳልፈለግክ ተቆጥሮ ፋይሉ ወደ መዝገብ ቤት ይመለሳል አለችኝ ፡ ተመልከቱ ቀጠሮዬን በማስተጓጎሌ ማን ተጎዳ ? በብዙ የተጎዳሁት እኔ ነኝ የሆስፒታሉንም ስራ አዛንፌአለሁ ፤ ሥራዬን ፈትቻለሁ ፤ ሕክምና አላገኘሁም ፤ ገንዘብ አጥቻልሁ ፤ ገንዘብ ከስሬአልሁ ፤ የዚያን ዕለት ቀጠሮ ማስተጓጎሌ ለእኔ ትምህርት ሆኖኛል ። ከዚያ በኋላ ግን የትም ቦታ ቢሆን ከቀጠሮዬ አስቀድሜ መድረስ እንዳለብኝ ተረድቻለሁ ። በጊዜ አለመጠቀም ብዙ ጎጂ ጎን አሉት ። ታማኝነት እናጣለን ፤ ተደማጭነት አይኖረንም ፤ እኛ ለጊዜ ክብር እንደማንሰጥ ለእኛ ክብር የሚሰጠን የለም ። አብክረን ልናስበው የሚገባው ነገር ቢኖር የሌላውን ወገን ጊዜ ብቻ ሳይሆን የእኛንም ጊዜ ማጥፋታችንን መረዳት አለብን ፤ በሌላ አቅጣጫ ስንመለከት በማንኛውም የአበሻ ቤተ ክርስቲያን ስብሰባው የሚጀመረው በዚህ ሰዓት ነው ተብሎ በየሳምንቱ ስብሰባ የሚጀመርበትን ሰዓት በተደጋጋሚ ይነገራል ፤ ስለስብሰባ ፕሮግራም ያልተነገረበት ዕለት ያለ አይመስለኝም ። ለምሳሌ ስብሰባው የሚጀመረው ሶስት ሰዓት ነው ፤ በሰዓቱ ተገኙ ይባላል ። ብዙዎቻችን የስብሰባው ፕሮግራም የሚጀመረው በአራት ሰዓት ነው የተባለ ይመስል ከቤታችን የምንወጣው በሶስት ሰዓት ተኩል ነው ። የመጣው ሕዝብ ጥቂት ስለሆነ አገልጋዮች ደግሞ ብዙ ሰው ስላልመጣ እስኪመጣ በማለት ስብሰባውን ወደኋላ ይጎቱታል በዚህ ምክንያት ሁሉም ፕሮግራሞች ይዛነፋሉ ። ለምሳሌ ከአምስት ዓመት በፊት ወደ አንድ የካናዳውያን ቤተክርስቲያን እሄድ ነበር ። ታዲያ ያ ቤተክርስቲያን በየሰንበቱ ሁለት ፕሮግራሞች አሉት ፤ ፕሮግራሞቹ በጊዜ የተገደቡ ናቸው ። የመዝሙሩ ፤ በመካከሉ ያለው አገልግሎትና ስብከቱ (ትምህርት) በተመሳሳይ ጊዜ የሚያልቁ ናቸው ። በሰዓቱ ሁሉም ነገር ይፈጸማል ፤ አንዱ ከአንዱ አይምታታም ። አገልጋይም ሆነ ተገልጋዩ ሕዝብ የጊዜን ጥቅም ተረድቶ በጊዜው ይጠቀማል አገልጋዮች ሰዓታቸውን ነው የሚያዩት ፤ ሰዓታቸው ሲደርስ አገልግሎታቸውን ይጀምራሉ ፤ ሰዓታቸው ሲደርስ ጨርሰው  ለሚቀጥለው አገልግሎትና አገልጋይ ያስረክባሉ ።  ይህ ጊዜ የጌታ ነውና በምንም ዓይነት ማንም አገልጋይም ሆነ ተገልጋዩ ሕዝብ ጊዜውን አይሰርቅም፤ጊዜውን አክብሮ ይገለገላል ። እኛስ ? ልናስብበት የሚገባ ጉዳይ ይመስለኛል ። በስብሰባ ፤ በቀጠሮ …  ምክንያት ብዙ ፕሮግራሞች ይዛነፋሉ እንመልከት አንዳንዶቻችን ከቤታችን የምንነሳበት ሰዓት ወደ ፀሎት ቤት ፤ ወደ ፕሮግራም የምንሄድ አይመስልም ፤ ከቤታችን ስንነሳ ከተነገርው የፕሮግራም ሰዓት በጣም አርፍደን ነው ። ዘግይተን በመምጣታችን ፕሮግራሙ ዘግይቶ ይጀመራል ፤ ፕሮግራም ሲዘገይ መዘምራን ሳምንት ያጠኑትን ሕዝቡን ሲያስመልኩበት ጊዜው ይሄዳል ፤ ሰባኪውም የተረከበው አርፍዶ ስለሆነ እርሱም ያዘጋጀሁትን መልእክት ልጨርስ ሲል ጊዜው ያልፋል ። ሁላችንም በጊዜአችን አልተጠቀምንም ። እንዴት ነው ተብሎ ሲጠየቅ የሀበሻ ነገር ነው ይባላል ። ሀበሻ ከዘር ማንዘሩ የወረሰው ይመስል ተረቱ ሁሉ የሀበሻ ነገር ነው ። እኛ ደግሞ ከዝባዝንኬ ወጥተን በክርስቶስ የምናምን ክርስቲያኖች ነን ፤ እንደ ክርስቲያንነታችን ታማኝና ቀጠሮ የምናከብር መሆን አለብን ፤ ጊዜያችንን እኛ ካላከበርን ማን ያከብርልናል ። ንጉስ ሰሎሞን ለሁሉም ጊዜ አለው ብሎናል ፤ ከሁሉም በላይ ደግሞ ጌታ ኢየሱስ ስለጊዜ እንደሚገባው በምሳሌዎቹ ሁሉ አስተምሮናል ።ጌታ ኢየሱስ ስለአስር ቆንጃጅት ሲናገር ፤ አምስት ብልህና አምስት ሰነፍ ቆንጃጅት የሙሽራውን መምጣት መብራታቸውን አብርተው ይጠብቁ እንደነበር ይገልጽልናል ። ብልህ ቆንጃጅት በትጋት የቀጠሮ ጊዜውን ሲጠብቁ ፤ ሰነፎች ቆንጃጂት ግን ቀጠሮአቸውን በመዘንጋት ማንቀላፋት ጀመሩ ። ሙሽራው በመጣ ጊዜ ግን ወደ ተጠሩበት እድሞ መግባት ሲገባቸው ዘይት ለመግዛት ወደ ከተማ ሄዱ ። ሙሽራው  በሰዓቱ የመጡትን እንግዶች ካስገባ በኋላ በሩን ዘጋው ። ጊዜውን አሳልፈው የመጡት ግን ሊገቡ አልተፈቀደላቸውም ። ዛሬ በሰዓት ምክንያት የሚቆጣጠረን ባይኖርም ከሁሉም በላይ የሕሊና ወቀሳ እንዳይደርስብን ልንጠነቀቅና ጊዜን መጠበቅ ባህላችን አድርገን ልንወስድ ይገባል ። አንድ ጊዜ  ብዙ ሕዝብ የተጋበዘበት ስብሰባ ተጠርቼ ነበር ። ወደ ስብሰባው አዳራሽ ስደርስ የመጡት ሰዎች በጣም ጥቂት ናቸው ። ሰብሳቢዎችም አልተገኙም ። ስብሰባው ሲዘገይ አጠገቤ ከሚገኘው ሰው ጋር ጨዋታ ጀመርን ፤ የስብሰባው ያለመጀመር የገረመው ሰው ሰዓት ስንት ነው አለኝ ? ሰዓቱን ነገርኩት ፤ ከተነገረው ጊዜ ሩብ ሰዓት ያለፈ ይመስለኛል አለኝ ፤ በተቀጠረበት ሰዓት አይደለም የሚጀመረው ፤ እንደአበሻ አቆጣጠር ከአንድ ሰዓት በኋላ ቢጀመር መልካም ነው አልኩት ፤ አንዱም ሰዓት አለፈ ግን አልተጀመረም ። በጊዜ ያለመጀመር ምክንያት የተገረመው የስብሰባ ጎረቤቴ እንደዚህ ብሎ አጫወተኝ ፤ ወደዚህ ከተማ ከመምጣቴ በፊት የምኖረው ቶሮንቶ ከተማ ነበር ። በዚያ ከተማ ዶከተር ማክቪት የሚባሉ የቤተ ክርስቲያን  እረኛ አሉ ። በከተማው የሚኖሩ ሀበሻ ክርስቲያኖች በቤተክርስቲያናቸው እንዲገለገሉ ቢጠይቋቸው ፤ እናንተ ታድጋላችሁ በማለት አምልኮ እንዲያመልኩበት ፈቀዱላቸው ። ታዲያ ከመግባባታቸው የተነሳ ለስብሰባም ሆነ ለአንዳንድ ጉዳይ ሲቀጥሩቸው  ሃያ ደቂቃ ፤ ግማሽ ሰዓት ወዘተ ……  ኢትዮጵያውያኑ እያረፈዱ ዘግየተው ይመጡ ጀመር ። ዶክተር ማኪቪትም  ምነው ወዳጄ አረፈድክ ብለው ሲጠይቁት ፤ ምክንያት እየፈጠረ ያልፋል ። ዶክተር ማክቪቲ የሚቀጥሩአቸው በሙሉ አንዳቸውም  በተቀጠሩበት ሰዓት የሚመጡ አይደሉም ። በቀጠሮ ሰዓት የማይመጡት ደግሞ ጥሩ ጥሩ ሰዓት ያላቸው ሰዎች ናቸው ። ዶክተር ማክቪት ነገሩ ሰልቸት ሲላቸው እንደዚህ በማለት ( የሀበሻ ሕዝብ ጊዜ የሚቆጥርበት ሰዓት አለው ፤ ግን ጊዜን አይጠቀምበትም ) ተናገሩ ብሎ አጫወተኝ ። መቼም ጊዜን የመጠበቅ ነገር ልናስበውና ልንጠነቀቅበት የሚገባ ጉዳይ ነውና ማሰተዋል ያለብን ጉዳይ ጊዜን ስንሰርቅ ከዕድሜያችን ላይ እንደምንሰርቅ አውቀን ፤ ጊዜን የመጠበቅና ቀጠሮን የማክበር ባህላችን ለማድረግ መለማመድ ይገባናል ። ለዚሁም የሰራዊት ጌታ እግዚኣብሔር ይርዳን ። 

                                                                     በቸር ይግጠመን!!!  

                                                                     ኃይሉ ነኝ!!

ኃይሉ ገቢ

hailuelalagebi@gmail.com

403 402 4669

ጌታን አገኘሁት

      ጌታን አገኘሁት

በክርስቶስ ላይ የተመሰረተ ሳይሆን በሰው ሰራሽ ወግና በዓለማዊ ተራ

ሥርዓት ላይ በተመሠረተ በፍልስፍና በከንቱ ሽንገላ ማንም እንዳያጠምዳችሁ

ትጠንቀቁ       ወደ ቆላስይስ ሰዎች 2፡8

ስም የሌለኝ ደካማ ነኝ

ሰው የምባል ሰው ያልሆንኩኝ

ዝም ብሎ ያለው ሕይወት

ተንቀሳቃሽ ምስለ ሐውልት

ተስፋ የሌለው ከንቱ ፍጥረት

ዱር አዳሪ ተሽከርካሪ

ውሎ አድሮ እዚያው ቀሪ

ማዳወሪያ ተባራሪ

በሸለቆ ውስጥ ነዋሪ

በራሴነት አሳፋሪ

ለተመቸው ጊዜ ላለው አጫፋሪ

እንዲህ ነበርኩ በኔ ዘመን

ጌታን ሳላውቅ ሰው ሳልሆን

ዘመን መጥቶ ዘመን ሲሄድ

የምጓዘው በርጉም መንገድ

ስመራርጥ ስለዋውጥ ስቀላውጥ

ሞቴ ሲደርስ ዓይኔ ፍጥጥ

ተገንዤ ወደሳጥን ሳልከተት

ወደ ሲዖል ከመሄዴ ቀድሞ በፊት

ድንገት ጌታን አገኘሁት

በመስቀል ላይ ቸንክረውት

ለእኔ ብቻ ተሰቅሎልኝ

ከዚህ ጉዴ ሊያወጣኝ

እንዲህ አለኝ ተናገረኝ

እኔ መልካም እረኛ ነኝ

ለፈጠርኩት ግድ የሚለኝ

ከዚህ ጣጣ ከዚህ ችግር

ከሃይማኖት ስብጥርጥር

ከገባህበት መጥፎ ነገር

እኔ ሕይወት ስለሆንኩኝ

አንተን ላድን ተሰቀልኩኝ

አንተ ሙታን የሆንክ

በሃይማኖት የተሸፈንክ

ተመለስ ተፈወስ ከሄድክበት

ከሞት መንደር ከሞትክበት

ይህንን ሲለኝ

ሲናገረኝ

ሙታን ሆኜ አገኘሁት

ሰው ለመሆን ተቀበልኩት

በጉዞዬ ተረዳሁት

ለእኔ ንጉሥ አደረግሁት

       በቸር ይግጠመን!!!

       ኃይሉ ነኝ!!

እኔም አልፈርድብሽም

                                          እኔም አልፈርድብሽም

      “እኔም አልፈርድብሽም” በሚለው ዓረፍተ ነገር ውስጥ አንድ ባለቤትና አንድ ማሰሪያ አንቀጽ ወይም ግስ አለው ። በሌላ አባባል ደግሞ ሁለት አካላት እንዳሉ የአማርኛችን የሰዋሰው አወቃቀር ይገልጸዋል። እኔም የሚለው ባለቤት ፈራጅና ምሕረት ሰጪና በሌላ ጎኑ የሚፈረድባት ወይም ምሕረት የተሰጣት በዚህ ዓረፍተ ነገር ውስጥ እናገኛለን ። ይህንን ርዕስ ያመጣሁት ቀጥታ ከዮሐንስ ወንጌል ምዕራፍ 8 ሲሆን ፤ጌታ ኢየሱስ በማለዳ በጠዋት ሕዝቡ በዙሪያው ተሰብስበው ወንጌል እያስተማራቸው ነበር። ከሳሾች የኦሪት ሕግ መምህራንና ፈሪሳውያን አንድ ስታመነዝር የተያዘችን ሴት ይዘው ፤ጌታ ኢየሱስ ከእነርሱ ጋር በመተባበር እንዲፈርድባት ወደእርሱ አመጡአት ። የሙሴ ሕግ አዋቂዎች “አባታችን ሙሴ በሰጠን ሕግ ላይ ማንም ሰው ሲያመነዝር የተያዘ በሞት ይቀጣ ” ብሎ አዞአል። እኛ ደግሞ የሕጉ ባለአደራዎች ስለሆንን ኃጢያት ሲሰራ ዝም ብለን ማየት ስለማንችል በሕጋችን መሰረት መገደል አለባት ።ሙሴ ያዘዘው ትህዛዝ ይህችን ሴት ለብቻዋ ጉዳዩ ይመልከታት አይመልከታት ሳይገናዝቡ ነበር ይዘዋት የመጡት፤ምክንያቱም ሕጉ በተለያየ ሁኔታ ስለሚገልጸው አንተስ ስለዚህች አመንዝራ ሴት ምን ትላለህ? ብለው ጌታ ኢየሱስን ጠየቁት። ጌታ ኢየሱስን ሊፈትኑት በሌላ ጎኑ ተባባሪ ሊያደርጉት እንዳሰቡ ተገንዝቦ ። የሰውን ልጅ ከሕግና ከኃጢያት ነፃ ለማውጣት ወደዚህ ምድር የመጣው ጌታ ኢየሱስ ጎንበስ ብሎ መፃፍ ጀመረ ። በቃ እሱም እንደኛ ጥቅሱን ጠቅሶ ሊፈርድባት ነው ብለው እርስ በእርሳቸው ሲጠቃቀሱ ፤ ጽሁፉን ጽፎ ጨርሶ ሲነሳ “ከእናንተ መካከል ኃጢያት የሌለበት በመጀመሪያ አስቀድሞ በድንጋይ ይውገራት” አላቸው ። የተጻፈውን ጽሑፍ ሲያነቡ ሐፍረታቸውን ተከናንበው አንድ በአንድ ቦታውን ለቀው መሄድ ጀመሩ። ጻድቅ ነን ብለው የሚኮፈሱት የሕግ መምህራንና ፈሪሳውያን ድንጋዩን በመጀመሪያ ከማንሳት የተቆጠቡት ኃጢያት መስራታቸውን የራሳቸው ሕሊና ስለፈረደባቸው ነው።እኛስ በአንድ ቤተስብ ኑሮ ፤ትዳር  ፤አገልግሎት ላይ የመጀመሪያውን ድንጋይ አንስቶ ለመወረውር ቅዱስ ነን?     

      ባለፈው ዓመት ከሥራ ወደቤት ለመመለስ ዳውን ታውን (Down Town) ባቡር ስጠብቅ ፤ አንድ በቅርብ ሩቅ የማውቀው ባቡር ጣቢያ ተገናኝተን ሰላምታ ከተሰጣጣን በኋላ ፤ ከቅርብ ጊዜ ጀምሮ ቤተ ክርስቲያን አላይህም ምነው አገልግሎትም ቀረ እንዴ? ብዬ ጠየቅሁት ። ጌታ ሲፈቅድ እጀምራለሁ አለኝ ። ምነው ብዬ አጥብቄ ብጠይቀው ሁኔታውን ገልጾ ነገረኝ ። ሁኔታውን ካዳመጥኩት በኋላ “ የእኔ ወንድም አንተ እንደነገርከኝ በተመሳሳይ ሁኔታ እኔም ችግር ደርሶብኝ ነበር ። ቅስሜ ተሰብሮ ሞራሌ ደቆ ሞት እስከሚያስመኘኝ ድረስ ተስፋ ቆርጪ ነበር ። የፈራጆችን ፍርድ ቁብ ሳልሰጣቸው ። በቤተ ክርስቲያን ተሳትፎና አገልግሎት ቀጠልኩኝ የጠላቴ ሽረባ እንዲወገድልኝ በጾምና በፀሎት ተጋሁኝ ያ እንደጉም ጨፍግጎ የያዘኝ ችግር ብንን አለ ይህው እንደምታየኝ ዛሬም በጌታ ቤት አለው ። ወንድሜ ሆይ! ጠላትን ማሸነፍ የምትችለው በእንደዚህ መንገድ ነው አልኩት ። በጉዳዩ ተስማምተን ሁለታችንም በየፊናችን ሄድን።  

      የእግዚኣብሔር ቃል “ ይቅር በሉ እናንተም ይቅርታን ታገኛላችሁ” ይላል ። ሁልጊዜም አንድ ሰው አጠፋ፤ ኃጢያተኛ ነው ፤ ወንጀለኛ ነው ፤ የውሸት ክርስቲያን ነው እያልን ለመፍረድ ይዳዳናል ያ ደግሞ ሚስጢር ነው ለማንም አትናገር በሚል የውሸት ካባ እንደ ሙሴ የሕግ ሰዎችና እንደፈሪሳውያን የምንፈርድባቸው ብዙዎች ነን እንደዚህ ከሆነ የክርስቶስ ተከታይነታችን በምን ይገለጻል ። እንዲያውም ያንን ሰው በጌታ ፍቅር መክሮና ወደንስሐ እንዲመጣ ማበረታታት እንጂ ጭራሹኑ ከጌታ ቤት እንዲወጣ መገፋፋት ተገቢ ነው?!! ያ ሰው ለእኔና ለአንተ ጌታ ኢየሱስ እንደሞተልን ለርሱም ሞቶለታል ። ጴጥሮስ ወደ ጌታ ኢየሱስ ቀርቦ ወንድሜ ቢበድለኝ ስንት ጊዜ ይቅር ልበለው ሰባት ጊዜ ነውን ብሎ ጴጥሮስ ለማረጋገጥ  ሲጠይቀው አይደለም አለ ጌታ ኢየሱስ ሰባት ጊዜ ሰባ ነው አለው እዚህ ላይ እንደምንመለከተው እንዲያውም የተበደልን ብንሆን እንኳን ሰባ ጊዜ ሰባ ይቅር በሉት ነው የሚለው ስለዚህ የጌታ ኢየሱስ ተከታዮች እንደመሆናችን መጠን ጥፋት አጥፍተዋል የምንላቸውን ሰዎች ይቅርታ በማድረግ ልባቸውን ወደጌታ እንዲመለሱ ብናደርግ መዝገባችን በሰማይ ይጻፍልናል ። ጌታ ኢየሱስ እንዲሰቀል የሚፈልጉት የካህናት አለቆች ነበሩ ። ሌላው በቄሳራዊው ጴላጦስ አደባባይ ቆመው ስቀለው!! ስቀለው!! ብለው የሚጮሁት ግማሹ ከአምስት ሺ ተመጋቢዎች ውስጥ ነው፤ ሌላው ፈውስን ከጌታ ኢየሱስ የተቀበለ ነው ፤ ቢያንስ ቢያንስ ታአምራት ሲደረግ አይቶአል። የእነዚህን ስዎች ሁኔታ ስንመለከት በደፈናው የሚያደርጉትን የማያውቁ ብቻ ስቀለው ስቀለው የሚሉ ናቸው ። መሐል ሰፋሪ የሆኑት አንዳንዶቹ የመንደር ሰዎች ገፋፍተዋቸው የመጡ ናቸው ። አንዳንዱም እንደይሁዳ የመጮያ ገንዘብ ተከፍሎት ነው ። የውስጥ ሚስጥሩን አያውቁም ብቻ ስቀለው ስቀለው ይሉ ነበር። ኃጢያት የሰራውን ያንን ሰው ስቀለው ስቀለው እያልን ከጌታ ቤት ከምናስወጣው በፍቅር ተቀብለነው በኃጢያቱ ተናዞ በቤቱ እንዲኖር ብናደርገው የእግዚኣብሔር ቃል እንደሚናገረው ገንዘብ አደረግከው ስለሚል የእግዚኣብሔርን መንግስት ያሰፋን ይመስለኛል። ነገር ግን ምንም ምክንያት ሳይኖረን ስቀለው ስቀለው የምንል ከሆነ ለእኛም አስቸጋሪ ዘመን ሊመጣብን ይችላል ። ለማንኛውም በሰው ፊት እንደምንታየው ጻዴቅ መምሰል ሳይሆን ሕይወታችን፤ ኑሮአችን ፤ ስልካችንና አነጋገራችን የተቀደሰ ሊሆን ይገባል ። እንዳይፈረድባችሁ በማንም ላይ አትፍረዱ ብሎ ጌታ ኢየሱስ እንዳስተማረን ። በሁሉም ነገር ላይ ፈራጅ ሆነን ሳለ ድንገት ጌታ ኢየሱስ ቢመጣ የተመካንበት ጽድቃችን ከንቱ እንዳይሆን እንጠንቀቅ!!!

                                                                                           በቸር ይግጠመን!!

                                                                                               ኃይሉ ነኝ     

   

እግዜር ያዘጋጃል

እግዜር ያዘጋጃል

ገና በጠዋቱ አብርሃም ሲጸልይ

ዓይኖቹ ተከፍተው ሲያይ ወደ ሰማይ

የሰራዊት ጌታ ሆኖ በክብሩ ላይ

እግዚኣብሔር ለአብርሃም እንደዚህ ጠየቀው

ምንም ሳያቅማማ መልስ እንዲሰጠው

እግዚሔር የፈተነው እንደዚህ የሚል ነው

እኔ የሰጠውህን በእርጅና ዘመን

አንዱ የምትወደውን ልጅህ ይስሐቅን

እኔ በማሳይህ በሞሪያ ተራራ

መስዋዕት አድርገህ ስጠኝ ሳትራራ

የእግዚኣብሔርን ጥያቄ ነገሩን አድንቆ

ማንም እንዳይጎዳ መንፈሱን ጠብቆ

የሚያደርገውን ሁሉ በኃይል ተጠንቅቆ

እንጨቱ እንዲነድ በደንብ ሰነጣጥቆ

መለኮሻ የሚሆን እንደያዘ እሳቱን

በሌላኛው እጁ ስላታም ቢላውን

በንጋት በጠዋት አዘጋጅቶ ሁሉን

አህያውን ጭኖ ጀመረ ጉዞውን

ከተጓዘ በኋላ ሶስት ቀንና ሌሊት

ልጁን ይስሐቅን ለእግዜር የሚሰዋበት

በሩቁ ተራራውን ሞሪያን ሲያዩት

አህያ ከነጓዙ በዚያ ስፍራ ትቶ

አብርሃም ሁለቱን ሎሌዎችን ጠርቶ

ጉዳዩን ነገራቸው ሚስጥሩን አስረድቶ

እናንተ እዚህ ቆዩ ጠብቁ አህዮችን

መስዋቱን ለማቅረብ እኛ እንሄዳለን

ለአምላክ የሚገባውን እንሰግድለታለን

መሰዋቱን አቅርበን ክብርን እንሰጣለን

እዚህ እንድትጠብቁን እኛ እንመጣለን

ወደሞሪያ ተራራ በመውጣት ላይ ሳሉ

ይስሕቅና አብርሃም እንዲህ ተባባሉ

እሳቱና እንጨቱ ይህው በእጄ ነው

ቢላው እንደሆነ በጣም የተሳለው

ካንተ ጋር ነው ያለው

ከዚህ በተረፈ እጃችን ባዶ ነው

የመስዋዕቱ በግ ለእግዜር የሚሰዋው

ወዴት ነው የሚገኘው?

ይህንን ጥያቄ ይስሐቅ ሲጠይቀው

በፍጥነት ነበረ አብርሃም የመለሰው

እኛ አዘጋጅተናል ቢላዋና እሳት

ለመንደድ እንዲያመች የተሻለ እንጨት

 ለአምላካችን የሚሆን መስዋዕት

ድርሻው የእግዚኣብሔር ነው በግ ለማዘጋጀት

                በቸር ይግጠመን!!

                ኃይሉ ነኝ!

በተጠራህበት ዘብ ቁም!!

                                               በተጠራህበት ዘብ ቁም!!

የኢአዲግ ሰራዊት አዲስ አበባ ሲቆጣጠር የዚያን ጊዜ ከፍተኛ ባለስልጣኑም ፤መካከለኛውም ፤ዝቅተኛውም ሹማምንት ፤ማለትም የደርግ አባላት ፤ሚኒስትሮች ፤የፀጥታ አባላት ፤የገበሬና የቀበሌ አባላት በጅምላ በአንድነት  እዚያው ዓለም በቃኝ እስር ቤት በአንድነት ታስረው ነበር።

  ሰንፎ የተቀመጠው እስረኛ አእምሮው እንዳይላሽቅ ትምህርት መማርና ማስተማር እንዳለበት ተረድቶ ከእስር ቤቱ አጠገብ ዛኒጋባ ቤት ተሰራና ትምህርት ተጀመረ። መጀመሪያ ለገበሬዎቹ ቅድሚያ ተሰጠና ትምህርቱ በየደረጃው እንደፍላጎቱ ቀጠለ፤ ዘብ ካለ ይማራል ዘብ ከሌለ ዘብ እስኪመጣ ይጠብቃል ። በኋላ በኋላ መግባባት ሲጀመር መማር መብቱ መሆኑን አምነው ሲቀበሉ በእስር ቤቱ ኮሚቴ አማካኝነት መማር ተጀመረ። እንደሚታወቀው በዘመኑ ኮምፒውተር ለብዙዎቻችን አዲስ ስለነበረ ፤አንድ የታወቁ እንጂነር (theory) ንድፈ ሀሳቡን አስተምረውን በኋላ ላይ አንድ ቤተሰብ ኮምፒውተሩን ገዝቶ ለእስር ቤቱ ስለሰጠ ሰጪው ዜግነቱ አሜሪካው ስለሆነ ኮምፒውተሩ በስንት መከራ ወደእስር ቤቱ ገባ ። እኛ ደግሞ ችግር ያደርሳሉ ተብሎ ስለተፈራ ለዚያ ኮምፒውተር አንድ ዘብ ተመድቦለት ነበር። ያንን ኮምፒውተር በደንብ ከፋፍተን ለማየትና ለመረዳት አትንኩ! አታድርጉ! የሚል ትህዛዝ ስለበዛብን ያንን ትምህርት የጀመረው በሙሉ መበስጫጨት ጀመረ። እኔ ደግሞ ከዚያ ዘብ ጋር በብዙ ነገር እንግባባ ስለነበረ ኮምፒውተር ያለ ስልክና ኢንተርኔት ምንም ባዶ ማለት ነው ለምን አንተ ዘብ ትቆማለህ? ተዉ!! አታድርጉ!! አትንኩ!!ትለናለህ ለምንድነው ብዬ ጠየቅኩት ። ከበላይ አለቃዬ ስለዚህ ኮምፒውተር ብዙ ተነግሮኛል ደግሞም የእናንተ አደገኛነት ከበረሃ ጀምሮ ስለምናውቀው እንደገናም  እናንተ በእንደዚህ ነገር በጣም የሰለጠናችሁ ስለሆነ አንድ ነገር አድርጋችሁ ከውጪው ዓለም ብትገናኙ  በንዝህላልነቴ የሚደርስብኝ እኔ አውቃለሁ ። ስለዚህ በተሰጠኝ የስራ ድርሻ ተጠንቅቄ መጠበቅ አለብኝ የእኔ ሥራ ኮምፒውተሩን መጠበቅ ስለሆነ እጠብቃለሁ አለኝ። ስለዚያ ወታደር ሳስብ በጣም ይገርመኝ ነበር በተሰጠውና በታዘዘው ነገር ሙሉ እምነት የነበረውና ለዓላማው ታማኝ ነበር ።   

   የእግዚኣብሔር ቃል በ2ጢሞ 2፡3 እንዲህ ይላል እንደ ክርስቶስ ኢየሱስ በጎ ወታደር ከእኛ ጋር መከራን ተቀበል በውትድርና የሚያገለግል ሰው አዛዡን ለማስደሰት ይጥራል እንጂ በሌላ ሥራ ራሱን አያጠላልፍም ።እንደ በጎ ወታደር ፤ በጎ የሚለው ቃል ከሳቴ ብርሃን ተሰማ መዝገበ ቃላት (ጠባየ መልካም፤ በጎ ሰው ፤ የተወደደ ፤ ያማረ ቅን የቀና ይለዋል ። በጎ ወታደር ምን ዓይነት ነው? በጎ ወታደር መከራን የሚቀበል ነው ፤ በጎ ወታደር አዛዡን ለማስደሰት የሚጥር ነው ፣ በጎ ወታደር ራሱን በሌላ ሥራ አያጠላልፍም ።እንደ መዝገበ ቃላቱ ደግሞ በጎ ወታደር በጎ ሰው ነው ፤ በጎ ወታደር ቅን ነው ። ወታደር የተሰጠውን የሥራ ድርሻ የሚሰራና የታዘዘውን የሚፈጽም ነው ። በውትድርና ውስጥ የተለያየ እርከን አለ ከተራ ወታደር እስከ ጄኔራል፤ ከተራ ወታደር ጀምሮ ሁሉም አለቃ አለው ። እኛ ግን በጎ ወታደርነታችን ለጌታችን ኢየሱስ ነው ። ጌታ ኢየሱስ ጠቅላይ አዛዣችንና ጠቅላይ መመሪያችን ነው ። ወታደር ከተሰጠው ሥራ ውጪ አይሰራም እያንዳንዳችን የክርስቶስ በጎ ወታደር ነን በክርስቶስ ኢየሱስ የተመረጥን ፣ ወታደር ደግሞ በተመደበበት ሥራ የሚሰራ ነው ከተሰጠው ሥራ ውጪ አይሰራም ምደባው ዘብ ከሆነ የዘብ ስራውን በትጋት ይሰራል ። በ1ቆሮንቶስ 12፡5-6 አገልግሎትም ልዩ ልዩ ሲሆን ፤ ጌታ ግን አንድ ነው ፤ አሰራርም ልዩ ልዩ ሲሆን ፤ ሁሉን በሁሉ የሚሰራው ግን ያው አንዱ እግዚኣብሔር ነው። ለውትድርና የተጠራንበት አገልግሎት በየትኛው ጎን ነው? ። አገልግሎት ልዩ ልዩ ነው በቤተ ክርስቲያን ወይም በጌታ ሥራ ውስጥ አገልግሎት የተለያየ ነው ። በወታደራዊ አገልግሎት ጌታ የመደበህ በየትኛው ክፍል ነው ?።ጸሎት ነው ፤ ማስተማር ነው ፤ መምከር ነው…….ወይስ ቤቱን ማጽዳት ካላውቅከው በጸሎት ጌታን ጠይቅህ አገልግሎትን መጀመር ያስፈልጋል ። በወታደራዊ አገልግሎት እንደምታየው ጠበብ ያለ ይመስላል ። ቤቱንም ማጽዳት ከፍተኛ አገልግሎት ነው ።ትርፍ ሳታተርፍ ብትገኝ ተጠያቂ ነህ !!ሳላገለግል ጌታ ቢመጣብኝ ተጠያቂ ነኝ!! ወታደሮች አለቃቸውን ለማስደስት ሥራቸውን እንደሚገባው እንደሚሰሩ፤አለቃቸው የማዕረግ እድገትና ሽልማት እንደሚሰጣቸው ያላግባቡ ሲፈጽሙ የተገኙ ደግሞ እንደሚጠየቁ ታውቃለህ? በማቴዎስ ወንጌል በምዕራፍ 25፡14-30 ና በሉቃስ ወንጌል በምዕራፍ 19፡11-27 ጌታ ኢየሱስ የሰጠው ምሳሌ ማስታወስ ይገባል አንድ መስፍን ንጉሥ ሆኖ ለመምጣት ወደ ሩቅ አገር ለመሄድ ሲዘጋጅ አገልጋዮቹን ጠርቶ ለእያንዳንዱ አስር ምናን ሰጣቸው ። ንግሥናውን ተቀብሎ ሲመለስ ፤ የመጀመሪያው ቀርቦ አስር ምናን ሰጠህኝ አስር ምናን አትርፎአል ይህው ገንዘብህ ብሎ ሰጠው ንጉሱም በአስር ከተማ ላይ ባለስልጣን አድርጎ ሾመው ። አምስት ያተረፈውም በአምስት ከተሞች ላይ ሾመው ። በመጨረሻ ጌታ ሆይ!!አንተ ካልዘራህበት የምታጭድ፤ ካልበተንህበትም የምትሰብስብ ጨካኝ ሰው መሆንህን አውቃለሁ ስለዚህ መሬት ቆፍሬ ቀበርኩት  ይህው ገንዘብህ ብሎ ለንጉሱ ሰጠው ። ንጉሡም አንተ ክፉ ፤ ሰነፍ አገልጋይ ያላስቀመጥኩትን የምወስድ ፤ ያልዘራሁትን የማጭድ ፤ ጨካኝ ሰው መሆኔን ካውቅህ ፤ መጥቼ ገንዘቤን ከነትርፉ እንድወስድ ለምን ለሚሰሩበት ሰዎች አልሰጠህም ? ጌታ ኢየሱስ ልንሰራበት የመንፈስ ቅዱስ ስጦታ ሰጥቶናል ያ ስጦታ ሰርተን ፍሬ ልናፈራበት ነው ።ስለዚህ እኛ በጎ ወታደሮች አዛዣችን ኢየሱስን በሁሉም ሁኔታ በተሰጠን ስጦታ ልናስደስተው ይገባል እንጂ እንደ ሰነፍ አገልጋይ የተሰጠን ብር ልንቀብረው አይገባም ስለዚህ በተጠራንበት አቅጣጫ ስብከት ቢሆን ምስክርነት መዝሙር ቢሆን ጸሎት ጌታ በሰጠን ስጦታ እናገልግል።ለዚህ ደግሞ መንፈስ ቅዱስ ምሬቱን ይስጠን!! አሜን!!!

                                          ቸር ይግጠመን!!!

                                            ኃይሉ ነኝ!                

አዋጅ ለባለጆሮዋ ቤተ ክርስቲያን

                                        አዋጅ ለባለጆሮዋ ቤተ ክርስቲያን

         በቅርብ ለዘመን መለወጫ አንድ ቀን ሲቀረው ከፌስ ቡክ ጓደኞቼ በአሜሪካ ሲልቨር ስፕሪንግ ማሪላንድ ከምትኖር እህቴ አዋጅ ለባለጆሮዋ ቤተክርስቲያን በሚል ርዕስ ኤሜል ደረሰኝ በቀጥታ ለእኔ የተፃፈ ስለነበረ አነበብኩት፤ ደግሜ አነበብኩት ለሶስተኛ ጊዜ ካነበብኩት በኋላ ይህንን አዋጅ ሌላውም ሊያነበው ይገባል ብዬ አንዳንድ ሃሳቦችን ጨምሬ ጻፍኩት። ሙሉ ለሙሉ ሃሳቡ የእህቴ ነው።

      ( ንቂ ንቂ ዲቦራ ንቂ ንቂ  ቅኔም ተቀኜ ) መሳፍንት 5፡12

 ንቂ ፥ንቃ ፥ ንቁ ፥ መንቃት የሚለውን ግስ ስንመለከት የከሰቴ ብርሃን ተሰማ መዝገበ ቃላት እንዲህ ይላል ዕውቀትን ለመሰብሰብ አህምሮውን የሰነገለ ፣ የወለወለ ሲለው ። የነቃ ፥ በዕውቀት የተባ ፥ ጥበብን ለመስማት የልቡናውን ጆሮ ቀቅሮ የሚያዳምጥ ይለዋል።

ሳባ የአማርኛ መዝገበ ቃላት ደግሞ ነቃ ተቀሰቀሰ፣ ተጠነቀቀ፣ ተጋ ይላል።

   ዲቦራና ባራቅ በዘመሩት መዝሙር ላይ የእግዚኣብሔር ሕዝብ ከከተሞቻቸው ተሰልፈው ወረዱ ይላል። ወርደው አልቆሙም ከላይ “ ዲቦራ ሆይ! ንቂ! ተነሺ! መዝሙር እየዘመርሽ ወደፊት ቀድመሽ ምሪ” ብለው ዘመሩ በነገራችን ላይ ዲቦራ የዕብሩ ትርጉም ንብ ማለት ነው ታዲያ የሕዝቡን መዝሙር ሰማች መጽሐፉን ስናነበው ምን ያህል የእግዚኣብሔርን ስራ እንደሰራች ታሪኳን ስናነብው ይገልጸዋል ። በዚህ ላይ የተጠቀሰው ጥቅስ ለእሷ የእግዚኣብሔርን ስራ ለመስራት ዋና መስረት ነው የሆናት ።  መንቃት በቀጥታ ከመጠቀም ጋር የተያያዘ ነው ። መጠቀም የሚቻለው ከሙሉ መንቃት ጋር ነው ።እንደ ዲቦራ።

     ግማሽ መንቃት ለተጠቃሚነት አያበቃም የከሰቴ ብርሃን መዝገበ ቃላት ዕውቀትን ለመሰብሰብ አህምሮውን የሰነገለ፥ ጥበብን ለመስማት የልቡናውን ጆሮ ቀቅሮ የሚያዳምጥ ይለዋል የተኛና በግማሽ መንቃት ለተጠቃሚነት አያበቃም የመኃልየን ቆንጅዬ ሴት “እኔ ተኝቻለሁ ልቤ ግን ነቅቶአል” አይደለም ያለችው። የመኃልዬ ቆንጆ ሙሉ ለሙሉ አለመንቃቷ ፍቅረኛዋን ልታገኝ ያለመቻሏን ትናገራለች። እግዚኣብሔር ለቤተ ክርስቲያን በሰጣት ትሩፋት ተጠቃሚ ለመሆን አንድ ነገር ግድ ይላታል ። መንቃት!! ለመንቃት ደግሞ ምን ያስፈልጋታል? ቤተ ክርስቲያን ለመንቃት ስነ-ጽሑፍ ያስፈልጋታል ምክንያቱም አንዱ የመንቂያ መንገድ ስነ-ጽሑፍ ነው። ቤተ ክርስቲያን ደግሞ ለስነ-ጽሑፍ ግድ የለሽ ናት ። ስነ-ጽሑፍ ምኗም አይደለም ። ስነ-ጽሑፍ ለቤተ ክርስቲያን ቢኖርም ባይኖርም የማይጠቅምም የማይጎዳም ነው ። እንደ ምንም ነገር ነው። ስነ-ጽሑፍ ለእግዚኣብሔርም ለሰይጣንም ጠቃሚያቸው ነው ።

       እግዚኣብሔር ለሰው ልጅ ሶስት ታላላቅ ስጦታዎችን ሰጥቶአል። በምንም የማይተኩ ከምንም የማይወዳደሩ ልጁን፤ መንፈሱንና ቃሉ ናቸው ። ከእነዚህ ሶስቱ ደግሞ አንደኛው (ቃሉ) በመጽሐፍ ደረጃ በእያንዳንዱ ክርስቲያን እጅ ይገኛል፤ መጽሐፍ ቅዱስ ያነባል ፤ ይማራል፤ያስተምረዋል፤ ያስነብበዋል፤ ያነበዋል፤ ያጠናዋል፤ ያስጠናዋል፤ ይሰብከዋል……..ይህ እጅግ ታላቅና ውድ ስጦታ ለሰው ልጆች ይደርስ ዘንድ እግዚኣብሔር የስነ-ጽሑፍ ችሎታውን በውስጣቸው ያሳደረባቸውን ሰዎች ተጠቅሞአል። ይህ ማለት ደግሞ እግዚኣብሔር ታላቅ ስጦታ የሆነውን ወደ ሕዝቡ ለማድረስ ስነ-ጽሑፍን ዋነኛ መሣሪያው አድርጎ ተጠቅሞአል ማለት ነው ። በድንቅ ድንቅ ስነ-ጽሑፍ የእግዚኣብሔር ታላቅ ሥራ የተገለጸው በስነ-ጽሑፍ ባለሙያዎች ነው ።

      በሌላ ጎኑ ደግሞ ሰይጣንም ታላላቅ የክህደት አስተምህሮችንም ያሰራጨው በስነ-ጽሑፍ አማካይነት ነው ።የስነ-ጽሑፍ ችሎታ ያላቸውን አድኖና አሳድዶ ተጠቅሞባቸዋል። በሃይማኖት ሽፋን ኢየሱስን “ሰው ብቻ” አድርገው በማስቀመጥ ቁጥር ስፍር የሌላቸውን ሰዎች ወደጥፋት የነዱ የስነ-ጽሑፍ ሰዎች ናቸው ። በቅርባችን ደግሞ ገድላትና ድርሳናትን በየስርቻውና በየቤታቸው በማዘጋጀት መጽሐፍ ቅዱስን ይዘው እንኳን ወደ ተረት እንዲሳቡ ለማድረግ የበቁት ሰይጣን የስነ-ጽሑፍ ሰዎችን በመጠቀም ነው ።

      ቤተ ክርስቲያንስ እንዴት ታድርግ? እግዚኣብሔር የስነ-ጽሑፍ ሰዎችን በስስት የሚያያቸው ለመሆናቸው ቅንጣት ያህል የምትጠራጠር አይመስልም !!ስለዚህ የስነ-ጽሑፍ አቅም ያላቸውን ልታበረታታቸው፤ አገልግሎቱን ልትደግፍና የእግዚኣብሔርን ሥራ እንዲሰራ ከጎን ልትቆም ይገባል ።

     ዲቦራዋ ቤተ ክርስቲያን ሆይ ንቂ!! እንቁዎችሽን አክብሪ ብዙ መስራትና መጥቀም ሲችሉ እንደ መኃልዬ ቆንጆ ባለመንቃት በችለተኛነት እንቁዎቻቸውን እንደታቀፉ አይጥፉብሽ አይሙቱብሽ። ቤተ ክርስቲያን ማለት ደግሞ እኔም ፤ አንቺም ፤ አንተም ፤ እሱም ፤ እሷም ፤ እነርሱም ፤ ሁላችንም ስለሆንን የእግዚኣብሔርን ሥራ ልንሰራ እንነሳ ቤተ ክርስቲያን ያለ ስነ-ጽሑፍ ግማሽ መንቃት ስለሆነ ነቅተን ለማንቃት እንድንችል አገልግሎቱን እንደግፍ