ይበርዳል ይሞቃል
ጥንት ዘር ማንዘሯ የተፈጠረበት
ፀሐይና ዝናብ የሚፋረቅበት
የአየሩ ሁኔታ ፕላስ ከሆነበት
የበረዶ ክምር ከማይታይበት
የቀዝቃዛ አየር ፍጹም ከሌለበት
ይህንን ይመስላል የተፈጠረችበት
አምላክ በጥበቡ እርሷን ከፈጠራት
ከምድር ማዕፀን እግዜር ካስቀመጣት
ከተራራ ግርጌ ሰው ከማይደርስበት
ሊቃውንት በጥበብ ፈልገው አግኝተው
የማዕድኑን ዋሻ ቆፍረው አውጥተው
የወርቅ ቡችላ መሆኗን አረጋግጠው
ከወንዝ ውስጥ ከተው በውሃ ፈትገው
ዘርዋ እንዳይበረዝ በእሳት አንጥረው
አፈሩን ገሠሡን ከእርሷ አስወግደው
ወርቅ ወርቅ እንደሆነች በእሳት ፈትነው
በማሽን ውስጥ ከተው ጌጣጌጥ አድርገው
የፍጥረት ዓለሙ በጣት የሚያጠልቀው
ሀብታሙም ደሃውም ደረቱ ላይ ያለው
የሚወዳት ሁሉ ስም ሰጥቶ የሚጠራት
ወርቄ ነች እያለ የሚያቆላምጣት
ደሃው በስሜቱ የራሱ ሊያደርጋት
ማዕለቅ ሳይከፍል ገንዘብ ሳይሰጥባት
በምኞት በመሳብ ወርቂነሽ የሚላት
አንዳንዱ በጣቱ ሌላው በእግሩ የሚያስራት
ወርቅ አልቦ አድርጎ ሰውን ሊስብባት
ውበቱም እንዲታይ በአፍንጫው የሚሰካት
የተረፈው ደግሞ በባንክ ያስቀመጣት
ያከበራት ሁሉ በሙዳይ ያኖራት
ጥቅሟን ላላወቀ የሸቀጥ ዕቃ ናት
ለእኔ ግን ብርቅ ነች እኩያ የሌላት
የወርቅ ቀለበቴ በጣቴ ያጠልቅኳት
የእኔ የሆነችው ጠዋት ማታ የማያት
ከጊዜ በኋላ ከረጅም ዓመታት
ከምሥራቅ ከምዕራብ እያንከራተቷት
ወርቅነሽ አልማዝ ነሽ ብለው እያታለሏት
አዙረው አዙረው ካናዳ አመጧት
ሸቅጠው ሸቃቅጠው አርቲ አደርጓት
ካናዳ እንደሆን የአየሩ ሁኔታ
የተለያየ ነው ጠዋታና ማታ
ደመናው ሲደምን ቅዝቃዜ ሲመጣ
በመዳይ እያለች ወደውጭ ሳትወጣ
ታማርረው ገባች የአየሩን ሁኔታ
ትዘክር ጀመር የትውልዷን ቦታ
የተፈጠርኩበት የኖርኩበት አገር
የአፈጣጠሪ ነገር ውበቴ ሲቀመር
በጠቅላላው ለእኔ ሁሉም መልካም ነበር
ዛሬ ቁር ሲነካኝ ውበቴን ሲያናጋው
ነሐስ አስመሰሉኝ ሽቅጥቅጥ አድርገው
ከነሐስ ከብር ጋር በአንድነት ሲያነጥሩኝ
አመዳም አድርገው ውበቴን ገፈውኝ
ነጋዴ ሲያታልል ነጭ ወርቅነሽ አሉኝ
አሁንስ ሰለቸኝ ተስፋ አስቆረጡኝ
ወርቅነቴ ቀርቶ አርቲ አደረጉኝ
እስከዛሬ ድረስ ተከብሬ ስኖር
የሁሉም ሚዛኑ የእኔ ውበት ነበር
ከእንግዲህ በኋላ ዘመን መጥቶልኛል
በጋው እየመጣ ክረምቱ ሄዶአል
መቀዝቀዙ ቀርቶ መሞቅ ጀምሮአል
ሰው ከጣለኝ ሥፍራ
የምፈልግበት
ጊዜ መጥቶልኛል ወርቄ የምባልበት
ዘሬ ተሰብስቦ ዘውድ የምሆንበት
በንጉሥ ጭንቅላት የምቀመጥበት
ንጉሥን በማለት ለእኔም ሚሰግዱበት
ወርቅነሽ ተብዬ ክብር የሚሰጡኝ ዕለት።
በቸር ይግጠመን!!
ኃይሉ ነኝ May 2009
No comments:
Post a Comment