የምዕመን
ፀሎት
ጳውሎስ በመልእክቱ ገልፆ እንደጻፈው
ለቀጣዩ ትውልድ ትምህርት እንዲሆነው
ለወገኖች ሁሉ እንዲህ ይነግረናል
ሁሉም እንዲረዳ ገልጾ ጽፎልናል
ስለወንጌል ብዬ እስረኛ የሆንኩት
ለአሕዛብ ወገኖች በጌታ የታጨውት
የወንጌልን ሚስጢር በደንብ እንድገልጸው
አፌንም ከፍቼ ቃሉን እንዳስተምረው
የተሰጠኝ አደራ በደንብ እንድወጣው
ለዚህ አገልግሎቴ ፀሎት ስለሚያሻው
እንድትጸልዩልኝ አደራ እላለሁ
ዛሬ በዘመናችን በዓለም በምድራችን
የመዳንን ወንጌል ለሕዝብ አስረድቶ
ተናግሮ ተሟግቶ አስተምሮ መርቶ
የሚበላው አጥቶ ራሱ ተራቁቶ
ሕዝቡን ከኃጢያቱ ከሰራው ርኩሰቱ
ነፃ ሲያወጣው በምስክርነቱ
መንጥቆ ሲያድነው ከጠላቱ ጎራ
ጉልበቱን ሳይሰስት ለተሰጠው አደራ
ሌት ከቀን ይታገላል በደስታም በመከራ
ለዚህ የእግዚኣብሔር ሰው ጌታ ለመረጠው
ከጎኑ የሚቆም ኸረ! ተስፋው ማነው?
ወንጌልን ለመግለጽ ቆሞ እንዲናገር
ለዳነም ላልዳነም ቃሉን እንዲተረትር
ወንጌልን ገልጾለት ያልዳነው እንዲድን
ከኃጢያቱ ወጥቶ የጌታ እንዲሆን
የዳነው ወገኑ በጌታ እንዲቆም
በጠላት ወረርሽኝ ወደዓለም እንዳያዘግም
የምስራቹን ቃል ለሕዝብ የሚያደርሰው
የደህንነት ወንጌል ለጠፋ የሚያበስረው
በእግዚኣብሔር ራዕይ ላይ ለተመሰረተው
በራዕዩ አቅጣጫ በጎኑ የሚሆንለት
ዓላማው እንዲሳካ የሚጸልይለት
ታማኝ ሆነን ጀግና ወደ አምላክ ጸባኦት
ሁሉም ያስፈልጋል ሊንበረከኩለት
ጀግና ለወንጌል አርበኛው
ራሱን ለጌታ ሕይወቱን የሰጠው
ዓለምና ትርፏን ወደኋላ ትቶ
የጌታውን መስቀል በራሱ ተክቶ
ወንጌል ለመናገር ለሕዝብ የተሰጠው
ብንጸልይለት ትርፋ የራሳችን ነው
መንፈስ ቅዱስ መጥቶ በዘይቱ ቀብቶ
የሚያስፈልገውን በእሳቱ ሞልቶ
ምክር ለሚያሻው ቃሉን እንዲነግረው
ሰውንም በድሎ ተግሳጽ ለሚገባው
አንዳችም ሳይፈራ ቃል እንዲያስተምረው
በድፍረት ለመስራት ፍሬውን ለማብዛት
ጠዋት ማታ ያሻዋል የምዕመን ፀሎት
በቸር ይግጠመን!!!
ኃይሉ ነኝ!!! 2007
No comments:
Post a Comment